વિશ્વભરમાં ધૂમ મચાવી રહ્યું છે કચ્છની આ બાળ કલાકારાનું રાષ્ટ્રગીત

હાલમાં પ્રજાસત્તાક પર્વ પર જ્યાં દેશના દરેક ખૂણે રાષ્ટ્રગાન ગવાયું ત્યારે અંજારની અગિયાર વર્ષીય ગાયિકા વાચા ઠક્કરના ‘જન ગન મન’ ને વિશ્વભરમાં ચાહકોએ ઉત્સાહભેર વધાવ્યો. આ ગીતમાં અંજારના બગીચાની જલક હોતા તેના વિડીયો સાથે અંજાર અને કચ્છ વિશ્વસ્તરે રોશન થયું છે જે સૌ કચ્છીઓ માટે ગૌરવની વાત છે. આ ગીતને યુટ્યુબ પર ત્રણ કરોડથી વધુ લોકોએ નિહાળ્યું, ૧ લાખથી પણ વધુ લોકોએ લાઇક્સ વરસાવ્યા ઉપરાંત સાડા સાત હજાર લોકોએ શોર્ટ્સ બનાવ્યા. એ સિવાય જીઓ સાવન પર નવ લાખથી વધુ લોકોએ આ ગીત માણ્યું તથા ત્યાં ટ્રેન્ડિંગ રહેતાં આ ગીતને જીઓ સાવને ‘બૉલીવુડ ડેકેડ 2010’ ની યાદીમાં પ્રથમ સ્થાન પણ આપ્યું હતું. ઇન્સ્ટાગ્રામ પર વાચાના આ ગીત પર દસ હજાર જેટલી રિલ બનતા છવીસમી જાન્યુઆરીથી તે હજુ પણ ટ્રેન્ડિંગમાં છે.

ગાયિકાએ ફક્ત સાત વર્ષની વયે આ ગીતને સ્વર આપ્યું જેમાં સંગીત અને દિગ્દર્શન જાણીતા ગીતકાર-સંગીતકાર ડૉ. કૃપેશ દ્વારા કરવામાં આવ્યું. આ ગીત કૃપ મ્યુઝિક દ્વારા વિશ્વસ્તરે લોન્ચ થયું જેથી નાની ઉમર, દેશભક્તિ અને મધુર અવાજ સાથે આ ગાયિકા લોકોનો હ્રદયમાં છવાઈ ગઈ. આ ગીતનું સંકલન ‘લવ યુ ભારત’ આલ્બમમાં થયું જેને હોમ મિનિસ્ટર શ્રી હર્ષભાઈ સંઘવી લોકાર્પિત કરી આશીર્વાદ આપ્યા હતાં.