સમાજમાં નારીઓના સર્વાંગી વિકાસ અને ઉન્નતિ માટે સમર્પિત તથા શિક્ષણ, સાહિત્ય, સંગીત અને સંસ્કૃતિના સંવર્ધન માટે મહિલાઓના નેતૃત્વ હેઠળ સતત કાર્યરત એવી કચ્છની નામાંકિત સંસ્થાઓ ‘ગૂંજે ગીતા કેન્દ્ર’, ‘કાવ્ય નિર્ઝરી’,’વાર્તા વિહાર’ અને ‘માતૃછાયા કન્યા વિદ્યા મંદિર’ ને ગિવ વાચા ફાઉન્ડેશન અને કૃપ મ્યુઝિક તરફથી મહિલા દિન નિમિતે ‘ગિવ વાચા ઍવોર્ડ ૨૦૨૪’ અંતર્ગત ‘વુમન્સ પર્વ પુરસ્કાર’ એનાયત કરવામાં આવ્યું.

સંસ્થાના મેનેજિંગ ડાયરેક્ટર ડૉ. કૃપેશ નયના શશીકાંત એ પુરસ્કૃત સંસ્થાઓનું અભિવાદન કરતાં કહ્યું કે “સમાજમાં દીકરીઓ અને મહિલાઓના સર્વાંગી વિકાસ અને ઉન્નતિ માટે આપે જે કર્મયોગ કર્યો છે તે સૌ માટે પ્રેરણારૂપ બન્યું છે. વુમન્સ પર્વ નિમિતે આપના યોગદાનને સરાહવાનો અમને આનંદ અને ગૌરવ છે.”

આ પ્રસંગે ‘ગૂંજે ગીતા કેન્દ્ર’ વિષે પરિચય આપતાં ડૉ. પૂજા ઠક્કર એ કહ્યું કે “આ કેન્દ્ર સનાતન સંસ્કૃતિના સંવર્ધન માટે સમર્પિત છે. જેમાં મહિલાઓ બધાંને ભગવદ્ ગીતા શિખવવાની નિઃશુલ્ક તાલીમ આપે છે. તથા ઘર-ઘર સુધી ગીતાનું સંદેશ પહોંચાડે છે. આ પહેલ અંતર્ગત પાંચસોથી પણ વધુ બાળકો અને સોથી પણ વધુ પરિવારો ગૂંજે ગીતાનો લાભ લઈ ચૂક્યા છે.” સાહિત્ય ક્ષેત્રે સક્રિય સંસ્થા ‘કાવ્ય નિર્ઝરી’ અને ‘વાર્તા વિહાર’ વતી પ્રમુખ રમીલાબેન મહેતા અને પુષ્પાબેન વૈદ્યએ કહ્યું કે “છેલ્લા પંદર વર્ષથી અમારી સંસ્થાઓ લેખિકા અને કવિયત્રીઓને પ્રોત્સાહન આપી અનેકવિધ પ્રવૃતિઓ કરતી આવી છે. અમારી બહેનોના કુલ ૩૦ જેટલા પુસ્તકો તથા સંસ્થાના પાંચ સંગ્રહો પ્રકાશિત થયા છે.” તો માતૃછાયા કન્યા વિદ્યામંદિરના આચાર્યા શ્રીમતી સુહાસબેન તન્ના એ કહ્યું કે “શાળાની પચાસથી પણ વધુ દીકરીઓએ વિવિધ ક્ષેત્રમાં રાજ્ય અને રાષ્ટ્રીય કક્ષાએ સફળતા મેળવી શાળાનું અને કચ્છનું નામ રોશન કર્યું છે. ત્યારે આ પુરસ્કાર સૌ વિદ્યાર્થીનીઓને પ્રેરણા આપશે.” આ ઉપરાંત ગિવ વાચાના ટ્રસ્ટી શ્રીમતી નયનાબેન શશીકાંત ઠક્કર એ સંસ્થા દ્વારા ઊજવતાં આગામી ઉત્સવો દરમિયાન કર્મયોગ કરતી વિભિન્ન સંસ્થાઓને તથા વ્યક્તિવિશેષને પુરસ્કારો પણ એનાયત કરવાની જાહેરાત કરી હતી.

હાલમાં, અંજારની સંસ્થા ગિવ વાચા ફાઉન્ડેશન અને કૃપ મ્યુઝિકના અગ્રણીઓ, સ્વયંસેવકો, સાહિત્યકારો અને બાળકો માવતરો સાથે ‘વેલેન્ટાઇન્સ પર્વ’ની દસમી વર્ષગાંઠ ઉજવવા માધાપર ખાતે શ્રી હરિ શાંતિનિકેતન વૃદ્ધાશ્રમમાં પહોંચ્યા.

દસ વર્ષ પહેલાં અમેરિકાથી પરત થયેલા રિસર્ચ સાયન્ટિસ્ટ ડૉ. કૃપેશ ઠક્કર એ વર્ષ ૨૦૧૪માં સૌ પ્રથમ આ પાશ્ચાત્ય દિવસને ‘વસુધૈવ કુટુંબકમ’ ના ભાવ સાથે વૃદ્ધાશ્રમ અને અનાથાશ્રમમાં ૭ થી ૧૪ ફેબ્રુઆરી દરમિયાન ‘વેલેન્ટાઇન્સ પર્વ’ રૂપે ઉજવી યુવાવર્ગને સનાતન સંસ્કૃતિ તરફ વળવાની પહેલ કરી હતી. જેમાં તેમણે ‘ક્યાં છે કાનો’ આલ્બમ લોન્ચ કરી સીતા-રામ અને રાધા-શ્યામને પ્રેમના આદર્શ પ્રતિક ગણાવ્યા હતાં.

સમયાંતરે આ ઉત્સવ ગુજરાતનાં વિવિધ શહેરોમાં તથા અમેરિકા, કેનેડા સહિત વિશ્વના સાત દેશોમાં થઈને કચ્છ સુધી પહોંચ્યો. આ દસમી વર્ષગાંઠની ઉજવણી ‘કૃપ લીટરેચર ફેસ્ટિવલ’ અંતર્ગત ભાષા અને સાહિત્ય સાથે થઈ, જેમાં વૃદ્ધાશ્રમના વડીલોએ પ્રાર્થના, ગૂંજે ગીતા અને કવિ સંમેલનની મજા માણી. ત્યાર બાદ વડીલ માતા-પિતાના વરદ હસ્તે ડૉ. કૃપેશના ‘વેલેન્ટાઇન્સ પર્વ’ અને ‘અર્જુન ઉવાચ: અધ્યાત્મિક જાત્રા’ પુસ્તકોનું વિમોચન થયું. કોઈ લેખકે વૃદ્ધાશ્રમમાં માવતરો સાથે પુસ્તકોનું લોકાર્પણ કર્યું હોય એવું આ પ્રથમ ઉદાહરણ અન્ય સર્જકો માટે પણ પ્રેરણાત્મક બની રહેશે.

આ પ્રસંગે દસ વર્ષની યાત્રાને યાદ કરતાં ડૉ. કૃપેશ એ કહ્યું કે ‘સૌને પ્રેમ કરવાની ભાવના સાથે ૨૦૧૪માં ‘વેલેન્ટાઇન્સ પર્વ’ને ‘હેલ્પીંગ હેન્ડમાં કાનો’, ‘સેલ્ફલેસ એક્ટમાં કાનો’, ‘એટીટ્યુડમાં કાનો’ અને ‘ગ્રેટિટ્યૂડમાં કાનો’ એમ ચાર સૂત્ર સાથે શરૂ કર્યું. આ વર્ષો દરમિયાન કોલેજોના હજારો યુવાનો આ કાર્યમાં જોડાયા. જેમણે અનાથાશ્રમ, વૃદ્ધાશ્રમ, હોસ્પિટલોમાં સેવા કરીને તથા શાળા-કોલેજોમાં સનાતન સંસ્કૃતિની પ્રવૃતિઓ કરીને તો તબીબોએ નિઃશુલ્ક નિદાન કેમ્પ તેમજ રકતદાન શિબિર સાથે આ અનેરું પર્વ ઉજવ્યું. આમ કર્મયોગ સાથે એક શહેરથી શરૂ થયેલું આ વિચાર સાત દેશો સુધી પહોંચ્યું હતું અને ફિલ્મજગતના કલાકારો પણ તેના સહભાગી થયા હતાં.”

વધુમાં ડૉ. પૂજાએ કહ્યું કે “વ્હાલ વૃદ્ધત્વ અંતર્ગત હવે કચ્છના આ વૃદ્ધાશ્રમમાં પણ સેવા કાર્યો થશે.” ત્યાર બાદ વૃદ્ધ માવતરોના સ્વાસ્થ્ય માટે તબીબોએ મ્યુઝિક થેરાપીની નિઃશુલ્ક તાલીમ આપી. તો સ્વયંસેવકો અને બાળકોએ વાર્તાલાપ અને અલ્પાહાર સાથે વડીલોની સેવા કરી. અત્રે ઉલ્લેખનીય છે કે સૌ વડીલો આ નવતર પ્રયોગથી ભાવવિભોર થયા હતાં.