વિશ્વભરમાં ઉજવાતા મધર્સ ડે ને અમેરિકાથી પરત ફરેલા ડોક્ટર એ ભારતીય સંસ્કારો, સનાતન ધર્મ અને નૈતિક મૂલ્યો ને સંકલિત કરીને ત્રીસ દિવસીય ‘મા પર્વ’ તહેવારનું સ્વરૂપ આપ્યું. જે માટે ‘માતૃદેવો ભવઃ’ ના વૈદિક સૂત્રથી મધર્સ ડે નિમિતે સૌ સેવા કાર્યો તેમણે ડૉ. કૃપેશ નયના શશીકાંત તરીકે તેમની માતાના નામ સાથે ઉજવવાની પહેલ કરી અને માતા પિતાના નામ સાથે ઓળખ સ્થાપિત કરનાર પ્રથમ ભારતીય બન્યા.

તેમના નેતૃત્વ હેઠળ ગિવ વાચા ફાઉન્ડેશન, કૃપ મ્યુઝિક અને ઈઝી આઈ.ડી. ના સંયુક્ત ઉપક્રમે મા પર્વની શરૂઆત તા. ૧૫ એપ્રિલ એ ગીવ વાચા સેન્ટર અંજાર ખાતે સંસ્થાના અગ્રણીઓ અને આમંત્રિત મહેમાનો એ માતૃ પૂજન સાથે કરી, તો પૂર્ણાહુતી 14 મે મધર્સ ડે નિમિતે વંદે માતરમ મેમોરીયલ, ભુજોડી ખાતે ભારત માતા અને ધરતી માતાની વંદના સાથે કરવામાં આવી. આ ત્રીસ દિવસીય પર્વ અંતર્ગત ફક્ત એક માતા નહિ પણ સનાતન સંસ્કૃતિ પર આધારિત ડૉ. કૃપેશના પુસ્તક ‘અર્જુન ઉવાચ: મા પર્વ’ અનુસાર માતાના અગિયાર રૂપ એટલે કે મા, ગીતા માતા, ગૌ માતા, તુલસી માતા, માતૃભાષા, ગુરુ, માતૃભૂમિ, ભારત માતા, લોકમાતા (નદીઓ), ધરતી માતા અને દેવી મા એમ વિવિધ સ્વરૂપોની વંદના અને તેમના પ્રત્યે કૃતજ્ઞતા અર્પિત કરવા અનેકવિધ કાર્યક્રમો થયા; જેમાં સામાજિક સાંસ્કૃતિક કાર્યક્રમો, કવિ સંમેલન, ગૌશાળામાં ગૂંજે ગીતા, વૃદ્ધાશ્રમમાં માતૃપૂજા, માતા ને સમર્પિત ગીતો અને ઓડીઓ પોએટ્રી ના વિમોચન તથા ગ્લોબલ ક્લબફૂટ અવેરનેસ પર્વ જેવા સ્વાસ્થ્ય સંબંધિત કાર્ય નો સમાવેશ થાય છે. આ પ્રોજેક્ટની વિશિષ્ટતા એ હતી કે પ્રથમ વખત કોઈ લેખકે પુસ્તક પ્રકાશિત થતા પહેલા તેમાં દર્શાવેલા સાંસ્કૃતિક અને નૈતિક મૂલ્યોનું સામાજિક સ્તરે અમલીકરણ કર્યું હોય.

પર્વ ફ્યુઝન બેન્ડ ના કલાકારો વિશ્વના યંગેસ્ટ સીંગર અને એક્ટર પર્વ પૂજા કૃપેશ, ધ નોટેશન ગર્લ વાચા પૂજા કૃપેશ, ડૉ. પૂજા પ્રવિણા જગદીશ તથા ડૉ. કૃપેશ એ આ ત્રીસ દિવસમાં પંદર જેટલા સંગીતમય ગૂંજે ગીતાના કાર્યક્રમો વિવિધ શહેરોમાં રજુ કર્યા. ગ્લોબલ લિટરેચર એન્ડ કલ્ચરલ કલબના સદસ્યોએ કલમ થકી યોગદાન આપ્યું તો સ્વયંસેવકોએ સંસ્થાના જે તે શહેરના ગિફ્ટ ઓફ ટાઇમ એમ્બેસેડર તરીકે માતાના નામ સાથે જોડાઈને સેવા કરી.

ગીવ વાચા ફાઉન્ડેશન ના ટ્રસ્ટી શ્રીમતી નયનાબેન દિવાળીબેન જેઠાલાલ અને ડૉ. શશીકાંત દેવકાબા ઉમરશી એ મધર્સ ડે, ઇન્ડિયન વે ની આ નવી વિચારધારામાં મા પર્વ દરમિયાન સંલગ્ન થયેલી સંસ્થાઓ અને લોકોનું હૃદય થી આભાર માન્યો. આમ એક પરિવાર એ શરૂ કરેલ આ પરંપરા વસુધૈવ કુટુમ્બકમની ભાવના સાથે વૈશ્વિક બની છે.

અંજારની સંસ્થા ગિવ વાચા ફાઉન્ડેશન, કૃપ મ્યુઝીક તથા ઇઝી આઈ.ડી. ના સંયુક્ત ઉપક્રમે ‘મા પર્વ’ નિમિતે માધાપરના શ્રીહરિ શાંતિનિકેતન વયસ્ક વિશ્રામ સ્થાન ખાતે દેવી પૂજાનું આયોજન થયું. જેમાં પર્વ ફ્યુઝન બેન્ડના કલાકારો ડૉ. કૃપેશ નયના શશીકાંત, ડૉ. પૂજા ઠક્કર, પર્વ ઠક્કર અને વાચા ઠક્કર એ ‘યા દેવી સર્વભુતે’ ના ભાવથી દેવી સ્વરૂપ વૃદ્ધ માતાઓનું પૂજન કર્યું અને આશીર્વાદ મેળવ્યા તથા ગૂંજે ગીતા પ્રસ્તુત કરી જેમાં ગીતા પઠન માટે પચાસ થી પણ વધુ વડિલો જોડાયા.

આ કાર્યક્રમમાં લેખક ડૉ. કૃપેશના  પુસ્તક ‘અર્જુન ઉવાચ : મા પર્વ’ ના મુખ પૃષ્ઠનું લોકાર્પણ વૃદ્ધ માતાઓના વરદ હસ્તે થયું. આ પ્રસંગે વરિષ્ઠ સાહિત્યકાર ડૉ. રમેશ ભટ્ટ, આશાપુરા ફાઉન્ડેશન વતી રાગીણીબેન વ્યાસ અને હસ્મીતાબેન ત્રિવેદી ઉપસ્થિત રહ્યા હતા. દેવી પુજાના હૃદયસ્પર્શી આયોજનમાં માતાઓએ પોતાના અનુભવને વ્યક્ત કરતા કહ્યું કે “આજના સમયમાં સંયુક્ત કુટુંબનું આદર્શ પૂરું પાડતું આ પરિવાર જયારે અમારું પૂજન કરી આ સંસ્કારોને જીવંત રાખતું હોય ત્યારે સૌ કોઈએ પ્રેરણા લેવી જોઈએ. એક માતા પિતાની ફરજ બને છે કે બાળકોમાં સંસ્કારોનું સિંચન થાય જેથી ભવિષ્યમાં અમારી જેમ કોઈને નિસહાય ના રહેવું પડે. ખાસ કરીને આ બંને બાળકો કે જે માતૃ પૂજા કરી રહ્યા છે તેમના થી આજની પેઢીને શીખ લેવી જોઈએ.” તો આ પ્રસંગે વક્તવ્ય આપતાં ડૉ. કૃપેશ એ કહ્યું કે “મા પર્વ માં અમે સૌ મારા આગામી પુસ્તક ‘અર્જુન ઉવાચ:મા પર્વ’ માં સૂચિત સનાતન ધર્મ અનુસાર માતાના અગિયાર સ્વરૂપો પ્રત્યે કૃતજ્ઞતા અર્પિત કરવા વિવિધ કાર્યક્રમોનું આયોજન કરી રહ્યા છીએ ત્યારે દેવી સ્વરૂપ માતાઓના આશીર્વાદ લઇ અને કચ્છમાં નવ જેટલા ગુંજે ગીતા કેન્દ્રો શરુ કરવાની અભિલાષા છે. કે જેથી આવનરી પેઢીમાં પોતાના માતા પિતા પ્રત્યેના કૃતજ્ઞતાના ભાવને જીવંત રાખી શકાય.” સંસ્થાનો આ સંકલ્પ પૂર્ણ થાય એટલે વડીલોએ આશીર્વાદ અને શુભેચ્છાઓ પાઠવી.

ગીવ વાચા ફાઉન્ડેશન અને કૃપ મ્યુઝીક દ્વારા હાલમાં ચાલી રહેલા ‘મા પર્વ’ અંતર્ગત માતૃભૂમિને વંદન કરવા ગુજરાત દિવસ નિમિતે પર્વ ફ્યુઝન બેન્ડના ‘ધન્ય ધરા ગુજરાતની’ ગીતના વિડિયોનું શ્રી ત્રિકમદાસજી મહારાજને હસ્તે સચ્ચિદાનંદ મંદિર લોકાર્પણ કરાયું. ગુજરાત અને તેની વિશેષતાઓનું ગુણગાન ધરાવતા આ ગીતને ગીતકાર અને સંગીતકાર ડૉ. કૃપેશ ઠક્કર એ શબ્દો તથા સંગીતથી શણગાર્યું છે તેમજ કચ્છી કલાકારો યંગેસ્ટ સીંગર ઇન વર્લ્ડ પર્વ ઠક્કર, વાચા ઠક્કર તથા ડોકટરે કંઠ આપ્યું છે.

આ વિડિયોનું શુટિંગ ગોવર્ધન ધામ તેમજ ભીમાસર ખાતે થયેલુ છે તથા ગુજરાતની ગરિમા એવા પર્યટન સ્થળોને પણ તેમાં સાંકળવામાં આવ્યા છે. આ ગીતના ફિલ્માંકન વિશે વાત કરતા ડૉ. કૃપેશે કહ્યું કે “હાલ ચાલી રહેલ ત્રીસ દિવસીય આ ઉત્સવમાં અમે મારા પુસ્તક ‘અર્જુન ઉવાચ: મા પર્વ’ માં દર્શાવેલ માતાના વિવિધ સ્વરૂપોની આરાધના કરીએ છીએ ત્યારે માતૃભાષા થકી માતૃભૂમિની આરાધના કરવાની તક અમને મળી એ અમારું સૌભાગ્ય છે અને ગુજરાત દિવસના શુભ અવસર પર આ વીડિઓ રજુ કરી જન્મભૂમિ પ્રત્યે અમે કૃતજ્ઞતા વ્યક્ત કરીએ છે.” બાળ કલાકારો પર્વ અને વાચા વિષે વાત કરતા ત્રિકમદાસજી મહારાજ એ કહ્યું કે, “અંજારના આ બંને બાળકો સનાતન મૂલ્યોને ફક્ત કચ્છ કે ગુજરાતમાં જ નહિ પણ સમગ્ર ભારત અને વિશ્વકક્ષાએ ઉજાગર કરે છે ત્યારે ગુજરાત દિવસ નિમિતે તેમનું આ કાર્ય કચ્છ માટે ગૌરવની વાત છે.”

કૃપ ફિલ્મ્સ દ્વારા કચ્છના નયનરમ્ય દ્રશ્યોને કેમેરામાં કંડારવામાં આવ્યા છે તેમજ કૃપ મ્યુઝીક રેકોર્ડ લેબલ દ્વારા વિશ્વભરમાં બસ્સોથી પણ વધુ પ્લેટફોર્મ પર આ ગીતને નિ:શુલ્ક લોન્ચ કરવામાં આવ્યું છે. અત્રે નોંધનીય છે કે આ કચ્છી કલાકારો કચ્છનાં વિવિધ પયર્ટન તથા ઐતિહાસિક સ્થળોને ઉજાગર કરવા પોતાના ગીતોનું ત્યાં ફિલ્માંકન કરી તેને વિશ્વભરમાં પહોંચાડે છે.

હાલમાં ગીવ વાચા ફાઉન્ડેશન અને કૃપ મ્યુઝીક દ્વારા ચાલતાં ‘મા પર્વ ૨૦૨૩’ અંતર્ગત અંજારના ગૂંજે ગીતા કેન્દ્ર ખાતે ગુરૂપૂજાનો અનોખો કાર્યક્રમ યોજવામાં આવ્યો. ડૉ. કૃપેશ ઠક્કરના પુસ્તક ‘અર્જુન ઉવાચ: મા પર્વ’ થી પ્રેરિત ત્રીસ દિવસીય તહેવારમાં માતાના અગિયાર સ્વરૂપોની પૂજા સાથે મધર્સ ડે ની ઉજવણી થાય છે ત્યારે અંજારના શિષ્યોએ માતાના સ્વરૂપ એવા તેમના ગુરૂનું પૂજન કરી કૃતજ્ઞતા વ્યક્ત કરી.

કાર્યક્રમની શરૂઆત સંસ્થાના મેનેજીંગ ટ્રસ્ટી ડૉ. કૃપેશ એ તેમના ગુરુ કલ્પનાબેન મહેતાના પૂજન સાથે કરી ત્યાર બાદ બાળ કલાકારો પર્વ અને વાચા એ તેમના ગુરૂ રીચાબેન ચાવડાની પૂજા કરી તથા શિક્ષિકાઓ શીતલબેન રબારી, ભાવનાબેન ભાવસાર, વૈશાલીબેન ભટ્ટ અને અંકિતાબેન જોશીની તેમના શિષ્યોએ આચાર્ય દેવો ભવ: ની ભાવનાથી પૂજન અને તુલસી માતા વડે સત્કાર કર્યું. આ સાથે ભાવવિભોર થયી ગયેલા ગુરૂ-શિષ્યોએ તેમની લાગણીઓ વ્યક્ત કરી. ત્યાર બાદ ગૂંજે ગીતા કાર્યક્રમ દ્વારા ગીતા માતાની આરાધના કરવામાં આવી જેમાં પર્વ ફ્યુઝન બેન્ડના કલાકારો પર્વ ઠક્કર, વાચા ઠક્કર, ડૉ. કૃપેશ અને ડૉ. પૂજા એ ગિટાર પર ગીતા પ્રસ્તુત કરી. આ પ્રસંગ વિશે વાત કરતા ડોકટરે કહ્યું કે “મા પર્વમાં સૌ સાથે મળીને સનાતન સંસ્કૃતિ અનુસાર માતાના વિવિધ સ્વરૂપોની આરાધના કરે છે. ત્યારે શિક્ષિકા કે જેઓ માતાની જેમ જ કાળજીપૂર્વક શિક્ષા અને જ્ઞાન આપી બાળકના ચારિત્ર્ય ઘડતરમાં યોગદાન આપે છે તેમના પ્રત્યે કૃતજ્ઞતા વ્યક્ત કરતા બાળકો શીખે એ આજના સમયની માંગ છે.”

આ ઉપરાંત કાર્યક્રમમાં ગર્ભ સંસ્કાર અને માતૃપૂજાના મહત્વ વિશે ડૉ. પૂજા ઠક્કર એ, તો માતૃભાષાના ઋણ વિશે વરિષ્ઠ સાહિત્યકાર ડૉ. રમેશ ભટ્ટ ‘રશ્મિ’ એ સમજ આપી. અત્રે ઉલ્લેખનીય છે કે ઈઝી આઈડી એ મા પર્વને વૈશ્વિક સ્તરે ઉજાગર કરવા તમામ ડીજીટલ સેવાઓ નિ:શુલ્ક આપી યોગદાન આપ્યું છે.

હાલમાં ગીવ વાચા ફાઉન્ડેશન અને કૃપ મ્યુઝીક દ્વારા વ્રજ ગૌશાળામાં ગૌ માતા સમક્ષ ગૂંજે ગીતાનો કાર્યક્રમ યોજાયો તથા બાળકોને ગૌ પૂજનના સંસ્કાર શીખવવામાં આવ્યા.

૧૫ એપ્રિલથી 14 મે સુધી ચાલી રહેલા વૈશ્વિક ‘મા પર્વ ૨૦૨૩’ અંતર્ગત સંસ્થા સનાતન સંસ્કૃતિ અનુસાર માતાના વિવિધ સ્વરૂપો માટે સામાજિક અને સાંસ્કૃતિક કાર્યો કરી રહી છે ત્યારે ગૌમાતા માટે મોટી નાગલપર મુકામે આવેલી શ્રી સચિદાનંદ મંદિરની વ્રજ ગૌશાળામાં ગૌ પૂજા અને ગૂંજે ગીતાનું આયોજન થયું. આ કાર્યક્રમ નાના બાળકોને ગાય માતાની પૂજાના મહત્વ વિશેની સમજ આપવામાં આવી; ત્યાર બાદ સૌએ સાથે મળીને ગાય માતાની પૂજા કરી તથા પર્વ ફ્યુઝન બેન્ડના કલાકારો પાંચ વર્ષીય પર્વ ઠક્કર, દસ વર્ષીય વાચા ઠક્કર તથા ગીતકાર અને સંગીતકાર ડૉ. કૃપેશ નયના શશીકાંત દ્વારા ગૂંજે ગીતા રજુ કરવામાં આવી જેમાં સૌ બાળકોએ ઉત્સાહભેર ભાગ લીધો. આ કાર્યક્રમના આયોજન બદલ મહંત શ્રી ત્રીકમદાસજી મહારાજે શુભકામનાઓ પાઠવી હતી.

આ પ્રસંગે સંસ્થાના ટ્રસ્ટી શ્રીમતી નયનાબેન ઠક્કર, ટીએચઓ. ડૉ. રાજીવભાઈ અંજારિયા તથા કૃપ મ્યુઝીકના ચેર પર્સન ડૉ. પૂજા ઉપસ્થિત રહ્યા અને ગૌ પૂજા કરી સૌને પ્રોત્સાહન આપ્યું. મા પર્વ વિષે વાત કરતા ડૉ. કૃપેશ એ કહ્યું કે “ભારતીય સંસ્કૃતિ અનુસાર માતાના વિવિધ સ્વરૂપોમાં ‘ગાવો વિશ્વાસ્ય માતર:’ એમ ગાયને માતા કહી છે. ગૌ પૂજા દ્વારા બાળકો ગાય માતાની પૂજા કરતાં શીખે અને ગાયનું મહિમા સમજે એ ઉદેશ્યથી આ પ્રવૃતિ કરવામાં આવે છે.” વધુમાં એક મ્યુઝીક થેરાપીસ્ટ તરીકે પોતાના અનુભવો વ્યક્ત કરતા એમણે ઉમેર્યું કે “ભક્તિ સંગીતની મન ઉપર હકારાત્મક અસરો ફક્ત મનુષ્યોમાં જ નહિ ગાયો પર પણ થાય છે માટે જયારે ગાય માતા સમક્ષ સંગીતમય રીતે ગીતા પઠન થાય એ તેમના સ્વાસ્થ્ય માટે ખુબ લાભદાયી બની શકે.” ગૌશાળામાં ગૌ પૂજા અને ગીતા પાઠને લોકોએ નોંધપાત્ર પ્રતિસાદ આપ્યો છે જેના પરિણામે આ પ્રવૃતિઓ ભવિષ્યમાં પણ થતી રહેશે એવી જાહેરાત કરવામાં આવી છે.

કૃપ મ્યુઝીક એ ગીતાના અધ્યાયને વિશ્વભરમાં બસોથી પણ વધુ પ્લેટફોર્મ પર નિશુલ્ક લોન્ચ કરી આ કાર્યમાં યોગદાન આપ્યું છે. સફળ સંચાલન માટે ડૉ. પૂજા ઠક્કર તથા વૈશાલીબેન ભટ્ટ એ જહેમત ઉઠાવી જેમાં સ્વયંસેવકો અંકુર સેવક, અંજલી સેવક, કલરવ રાઠોડ અને યશ ટાંક એ સેવા આપી.